ढाणकी प्रतिनिधी : गावाच्या विकासकामांबाबत चर्चा तसेच विविध शासकीय योजनांची माहिती ग्रामस्थांपर्यंत पोहोचण्यासाठी ग्रामसभा महत्त्वाची भूमिका बजावते. मात्र, अकोली येथे ग्रामसभा घेण्याबाबत प्रशासनाकडून अपेक्षित कार्यवाही होत नसल्याचा आरोप करत ग्रामस्थांनी आक्रमक भूमिका घेतली आहे.
१५ ऑगस्ट रोजी ग्रामसभा घेण्यात यावी, अशी ग्रामस्थांची अपेक्षा होती. मात्र, ग्रामसभा घेण्यात आली नसल्याचा दावा ग्रामस्थांनी केला आहे. ग्रामसभा वेळेवर न झाल्यामुळे गावातील नागरिकांना विविध शासकीय योजना, विकासकामे आणि ग्रामपंचायतीच्या कामकाजाबाबत आवश्यक माहिती मिळण्यास अडचण निर्माण होत असल्याचे निवेदनात नमूद करण्यात आले आहे.
ग्रामपंचायतीच्या माध्यमातून ग्रामसभा नियमितपणे घेण्यात यावी आणि ग्रामस्थांना त्यांच्या हक्कांची व शासकीय योजनांची माहिती मिळावी, अशी मागणी ग्रामस्थांनी केली आहे. ग्रामसभा घेण्यास विलंब का होत आहे, असा सवालही ग्रामस्थांनी उपस्थित केला आहे.
आठ दिवसांची मुदत; अन्यथा आंदोलन
येत्या आठ दिवसांत ग्रामसभा घेण्यात यावी, अशी मागणी ग्रामस्थांनी निवेदनाद्वारे केली आहे. या कालावधीत ग्रामसभा न झाल्यास अकोली ग्रामपंचायत कार्यालयासमोर ग्रामस्थांच्या वतीने ‘बोंब मारो’ आंदोलन करण्यात येईल, असा इशारा निवेदनातून देण्यात आला आहे.
या निवेदनावेळी अनिल राठोड, गजानन पवार, नवल विजय पवार, संतोष पवार यांच्यासह अनेक ग्रामस्थ उपस्थित होते.
0 टिप्पण्या